Un fasso de sole infila el buso del monte Priaforà
e l’ombra che tuto sconde lasa solo la piassa iluminà
Xe destin che un tramonto iluda par un secondo ch’el giorno no’ finirà
la luce conta le robe niente pare che manche e la domenega và .

Ma qualcosa che cambia se vede solo pasando
giorno par giorno atraverso lo steso punto e vardando
come che i ani trasforma con l’aiuto del tempo
serte ferite grondanti in cicatrici diverse
che silensiose le stà come sgrisardole al sole
spetando el giro del mondo e naltro colpo de man.

Cosi someja que’e rane soto el fasso de sole che le caressa pian pian,
ferme co’ l’aqua in te’a gola a l’ombra de veci cedri vegnù da lontan...
Aqua che spande ogni tanto fili de perle incurvà
consumando la piera grisa e zà meza crepà..
Quel’aqua come i pensieri no’a score più come ieri
e come queo che xe stà , xe solo aqua pasà.

E vedo neri africani,slavi orientali sudamericani,
xe lori a dare un novo senso al sole adesso lari larà
copie vestie come che i usa lori, anime in pena piene de colori,
boce che siga che gira in tondo xe qua la giostra , futuro del mondo larì larà.

Con le campane tirà dai sogatti che ciama tuti davanti al Signore
con l’ostia in alto e col prete che dise: “ De tuti questo xe el pan “.
Che tanto el circo del lunedì ne speta tuti co’ canta el galo
zali maron neri mulati olivastri - bianchi meridionali o magnagati !!!

No me dispiase queo che vedo ma senti,
ma dove xei tuti i me paesani, par quasi esare pecà mortale
zugare insieme gati coi cani ...
e me vien in mente le nostre vali strapopolà de cognomi strani
che fa ormai parte dea nostra cultura vecia de guere de tanti ani...
che se te snasi co’ sentimento l’aria de Posena o dea Valarsa
te senti ancora inamorarse l’austriaco de na tosa nostrana

A semo tuti su ‘ a stesa barca come animali acopià in te un arca
e un giorno forse se navigare ma un remo solo va poco lontan...
E qualchedun no’ capisse ancora che ‘a division a volte no’a dà resto
e far tornare i conti con la vita che vole amore e un poco de bon senso ...
che dentro al core de ste montagne che ne stà intorno discrete e mute
xe scrito el libro del mondo intiero , piera col salso sugà dal tempo ...

Tanti che riva da n’altra tera xe sabia fina dentro na bufera,
ghe xe dolore sangue sgomento, povare rabie portà dal vento...
ghe xe rinunce e tragedie che mai xe imparentà con na so’ decision
come ne’e guere scrite su un fojo che manda i altri ala desolasion

E quei che riva da naltra tera i riva quasi sempre che xe sera
sperando prima che sia massa tardi se possa andar na volta in libertà
a consumare un fasso de sole pasà de sfroso come un clandestin
atraverso el buso iluminà del monte Priaforà